Hindi Shayari

Wehshaton ke mor par le aayi mujh ko zindagi

Wehshaton ke mor par le aayi mujh ko zindagi
Aik pal bhi tere bin na bhai mujh ko zindagi

Mukhtasir se waqt main dekhi bahar-e-arzoo
Char din ko gulsitan main laai mujhko zindagi

Apne hi andar utarnay ka mujhe rasta mila
Tujh se milker de gai gehrai mujh ko zindagi

Justujoo main chand ki, urnay ki koshish kar to lee
Laikin uske baad na raas aayi mujhko zindagi

Main ne poocha zindagi se ishq ka anjaam to
keh gai hai kaam main ruswai mujhko zindagi

Ab to chunnay hain mujhe yaadon ke moti umr bhar
De gai soghat main tanhai mujh ko zindagi...

Syed Bilal