Dilon Mai Sama Nahi Sakti

Labon Pe Rukti, Dilon Mai Sama Nahi Sakti
Wo Ek Baat Jo Lafzon Mai Aa Nahi Sakti

Jo Dil Mai Ho Nazar-e-Gham To Ashq Paani Hai
Ke Aag Khaak Ko Kundan Bana Nahi Sakti

Yaqeen, Gumaan Se Bahar To Ho Nahi Sakta
Nazar Khayaal Se Aagey To Jaa Nahi Sakti

Dilon Ki Ramz Faqat Ehl-e-Dil Jaantey Hein
Teri Samajh Mai Meri Baat Aaa Nahi Sakti

Yeh Souz-e-Ishq To Goongey Ka Khuaab Hai Jesey
Meri Zubaan Meri Haalat Bataa Nahi Sakti

Simat Rahi Hai Mere Baazuoun Ke Halqay Mai
Haya Ke Boojh Se Palkein Utha Nahi Sakti

Jo Keh Raha Hai Sulagta Hua Badan Us Ka
Bata Bhi Paati Nahi, Aur Chupa Nahi Sakti

Ek Aise Hijar Ki Aatish Hai Mere Dil Mai Jesey
Kisi Visal Ki Baarish Bujhaa Nahi Sakti

To Jo Bhi Hona Hai, Amjad Yahin Pe Hona Hai
Zameen Madaar Se Bahar To Jaa Nahi Sakti

Poet: Amjad Islaam Amjad

Related Posts Plugin for WordPress, Blogger...